Яқинда йўлимиз тушиб, Мирмирондаги намунали уйлар тугаб, Ертепага етмаси йўлнинг чап томонида жойлашган газ қуйиш шохобчасидан машинага газ солмоқчи бўлдик. Кираверишда “Маиший газ баллонларга газ тўлдирилмайди” дея катта-катта қилиб ёзиб қўйилгани ҳолда ичкарида бир нечта баллонларга газ қуйиб берилаётгани бизни таажжубга солди.

Буниси етмаганидай, автомобилларга газ йўқлигини ҳам маълум қилишди (газ баллонга бору машинага йўқ эмиш). Газ баллонга ишора қилсак, “Биласиз-ку, бу ҳамма жойда бор” қабилидаги жавобни олдик.

Тўғри, шохобчага қай йўл билан бўлсин, фойда келгани муҳимроқ, бироқ маиший газ баллонларини бундай шохобчаларда тўлдириш тақиқланганми, демак, бунга риоя этиш шарт.

Аҳоли учун эса иши битмаги ҳар недан афзалроқ. Яъни газ баллондаги газ тугаса, маҳалладаги шохобчадан уни қачон қабул қилишларини, қачон тўлдириб келишларини кутиб туролмайди (яшаш керак, ахир). Беш-олти баравар қимматига бўлса ҳам кўчадан тўлдириб келади.

Газ қуйиш шохобчаларида маиший газ баллонларини тўлдиришга эҳтиёж борми, демак, маҳаллаларда аҳолининг суюлтирилган газга бўлган талаб ва эҳтиёжи қанча эканлиги ҳисобга олинмаяпти (газни кўп ишлатса, пулини тўлайди. Ҳарҳолда газ танқис мамлакатда яшамаймиз). Бу борада туман газ идоралари ҳам бирор чора белгилаганига ишониш қийин. Бўлмаса, газ идораси мутасаддилари “заправка”да тўлдирилаётган газ баллонларини кўрмайди, дейсизми?! Кўради, кўп кўради. Чамаси бир ташвишим камайди, дея хурсанд ҳам бўлиб қўяди.

Лекин бунда энг асосий масала: инсон омилини эсдан чиқармаслик керак. Бир киши ўзи ва бошқаларнинг ҳаётини хавфга қўяяптими, демак, бунинг олдини олиш чораларини кўриш, талаб ва эҳтиёжни ҳисобга олиш зарур. Маиший газ баллонларини аниқ бир муддатда қабул қилиб, қолган вақтда рад этиш эмас, ҳудудлар ва оилалар ҳолатини ўрганиб, шунга кўра ишга ёндашиш керак. Аслида бу туман газ идораларининг бирламчи вазифаси. Бироқ биласизки, ён-атрофга панжа орасидан қаралса, айрим нарсалар кўринмайди...

Б.ЎКТАМ

Собир НАРЗИЕВ олган суратлар