Шу муносабат билан Ёшлар марказида уюштирилган матбуот анжуманида ташкилотнинг масъул ходимлари, ҳамкорлар, тадбиркорликка қизиқувчи ёшлар ҳамда ОАВ вакиллари иштирок этди.

Марказнинг асосий мақсади - ёшларимизнинг мамлакатда амалга оширилаётган иқтисодий ислоҳотлардаги иштирокини янада фаоллаштириш, ёшлар тадбиркорлигини қўллаб-қувватлаш, уларда тадбиркорлик кўникмаларини шакллантириш, шу йўналишдаги ғояларини ҳаётга татбиқ этишда кўмаклашиш, мавжуд муаммо ва масалаларни биргаликда ҳал этишдан иборатдир.

- Ёш тадбиркорларни ҳар томонлама қўллаб-қувватлаш мақсадида ташкил этилган ушбу марказ олдига кўплаб вазифалар қўйилган, - дейди марказнинг вилоят бўлинмаси раҳбари Адҳам Тоҳиров. - Хусусан, ёшларда ишбилармонлик қобилиятини ривожлантириш, уларни кичик бизнес ва хусусий тадбиркорликка кенг жалб этиш, ташаббусларини рағбатлантириш, маҳаллаларда фаолият олиб борадиган бизнес-тренерлар фаолиятини йўлга қўйиш ва ёш тадбиркорлар ҳуқуқ ва манфаатларини ҳимоя қилиш, хорижий давлатлардаги тадбиркорлик субъектлари билан яқин ҳамкорлик алоқаларини ўрнатиш, тажриба алмашиш ҳамда тадбиркорликка оид халқаро кўргазма ва анжуманларда иштирок этишларига кўмаклашиш каби саъй-ҳаракатлар кўзда тутилган.

Тадбир давомида ОАВ вакиллари ва ёш тадбиркорларга марказнинг мақсад, вазифалари ва ҳуқуқий асослари, фаолият йўналишлари ҳақида батафсил маълумотлар берилди.

Аҳрор СОДИҚОВ