Қарши шаҳрида Мустақиллик майдони, Наврўз хиёбони, Алишер Навоий номли маданият ва истироҳат боғи ҳамда болалар маданият ва истироҳат боғида, маҳалла гузарларида байрам арчалари ўрнатилди. Эртадан театрлаштирилган томошалар, концерт дастурлари намойиши бошлаб юборилади. Байрамни кўнгилдагидек кутиб олиш, байрам тадбирлари ўтказиладиган жойлар, аҳоли пунктлари ва ижтимоий объектларда осойишталик ва ёнғин хавфсизлигини таъминлашга алоҳида эътибор қаратилмоқда.

"Президент арчаси" тантаналарини айниқса болалар орзиқиб кутади. Уларга бир олам қувонч, арча атрофидаги қизиқарли томошалар, турли совғалару унутилмас таассуротларни ҳадя этувчи бу тадбир давомида қишнинг аёзли ҳароратига ажиб бир илиқлик инади.

- Бу йилги "Янги йилнинг ёрқин ёрлиғи" деб номланган театрлаштирилган байрам тадбирлари кўтаринки руҳда ўтиши учун қизғин тайёргарлик кўрилди, - дейди вилоят маданият ва спорт ишлари бошқармаси етакчи мутахассиси Жасурбек Саттаров. - Байрам дастурларида юртимиздаги тинчлик-осо-йишталик, халқимиз ҳаётидаги янгиланиш ва ўзгаришлар, шу билан бирга, соғлом бола тарбияси йўлида амалга оширилаётган ишлар ўз ифодасини топган.

"Президент арчаси" байрам дастурини болаларга чинакам байрам кайфияти берадиган руҳда, уларнинг ёдида узоқ вақт сақланадиган даражада ташкил этиш бўйича академик ва халқ бадиий жамоалари, ашула ва рақс ансамбллари, "Ўзбекнаво" эстрада бирлашмаси вилоят бўлими, қўғирчоқ театри, мусиқали драма театри, Қарши санъат, маданият ва туризм коллежлари қошида ташкил этилган бадиий жамоаларнинг театрлаштирилган томошалари, концерт дастурлари намойиши режалаштирилган.

Шунингдек, туманларда, айниқса, чекка ҳудудларда ўтказиладиган байрам тадбирларида театр актёрлари ва эстрада хонандалари ўз дастурлари билан қатнашади.

Анъанага мувофиқ, тадбир доирасида меҳрибонлик, гўдаклар, мурувват уйлари, махсус мактаб-интернатлар, ихтисослашган тарбия муассасаларининг ўғил-қизлари, маҳаллалардаги боқувчисини йўқотган оилалар фарзандларига Президент совғалари улашилади.

Н.ХЎЖАЕВ