ИЧКИ ТУРИЗМ ЯНАДА РИВОЖЛАНАДИ

- “Village park” (инглизча “Village park” “қишлоқ парки” деган маънони англатади) ни дунёнинг кўплаб шаҳарларида учратиш мумкин. Мазкур дам олиш оромгоҳи Шаҳрисабз шаҳрида ички ва ташқи туризмни янада ривожлантириш, маҳаллий аҳолининг мазмунли дам олишини таъминлаш мақсадида ташкил этилаяпти. 20 гектар ҳудудни қамраб оладиган “Village park” лойиҳаси асосида ҳозирги вақтга келиб қурилишнинг ер ишлари тугатилди ва кейинги босқичга ўтилмоқда. Режага мувофиқ, 2017 йилнинг ёз мавсумида унинг биринчи қисми фойдаланишга топширилади.

МЎЪЖАЗ СПОРТ МАЖМУАСИ  ТАШКИЛ ЭТИЛАДИ

- “Village park” дам олиш оромгоҳида алоҳида спорт майдончалари мажмуаси барпо этилади. У ерда аҳоли кенг қатламлари мини футбол, баскетбол, волейбол, теннис каби спорт турлари билан шуғулланиши мумкин бўлади. Шунингдек, мазкур иншоот замонавий кўринишдаги боулинг клубини ҳам ўз ичига олади. Бундан ташқари, парк ҳудудининг 5 гектарча ерида гольф майдони бунёд этилади. Бу вилоятимизда мазкур спорт турини оммалаштириш йўлидаги муҳим қадам бўлади, десак адашмаймиз.

Шунингдек, лойиҳа бўйича иншоот таркибида аёллар учун фитнес-клуб, эркаклар учун тренажёр зали ҳамда 2 та сув ҳавзасини қуриш кўзда тутилган.

БОЛАЛАР МАМЛАКАТИГА САЁҲАТ

- Лойиҳамизнинг муҳим қисмларидан бири бу – “Kinderland” (“Болалар мамлакати”) ва “Game World” (технопарк) ҳисобланади. Янги қурилажак “Kinderland”да болалар учун замонавий аттракционлар ва турли ўйин қурилмалари ўрнатилса, икки қаватли “Game World” технопарки эса 5 ёшдан 15 ёшгача бўлган болалар учун севимли масканга айланишига шубҳа йўқ. Технопаркдаги сўнгги русумдаги технологиялар билан жиҳозланадиган компьютер маркази эса  болаларнинг турли фанларга оид билимларини ошириш, тасаввурини бойитишга ёрдам беради.

ҚЎШИМЧА ҚУЛАЙЛИКЛАР МУҲАЙЁ ЭТИЛАДИ

- Ўз навбатида, “Village park” дам олиш оромгоҳига ташриф буюрувчилар қамровини янада кенгайтириш ва қўшимча қулайликлар яратиш ҳам эътиборга олинган. Шу мақсадда ушбу масканда аҳоли оилавий тамадди қилиши учун иккита ресторан қурилади. Шунингдек, замонавий кинотеатр иш бошлайди. Парк иқлимини мўътадиллаштириш, унинг мусоффолигини сақлаш ва ҳудуд экологиясини барқарорлаштириш ниятида дунёнинг турли давлатларидан келтириладиган манзарали дарахтлар ва гуллардан иборат экобоғ ташкил этилиши режалаштирилган. Бошқача айтганда, унда сайр этган киши ўзини табиатнинг бир қисмидек ҳис қилади. Шунингдек, парк ҳудудида меҳмонлар учун кемпинг ҳамда Шаҳрисабз шаҳрининг ўтмиши ва бугуни уйғунлик касб этган уй меҳмонхоналари қад ростлайди. Бу янгиликлар сайёҳларни бефарқ қолдирмаслиги турган гап.

Мамлакатимизда амалга оширилаётган бу каби бунёдкорлик ишлари аҳолининг мазмунли дам олиши, маданий ҳордиқ чиқариши учун кенг шароит яратиш, шунингдек, ҳудудлар жозибадорлигини ошириш, туристик салоҳиятини юксалтиришга қаратилгани билан аҳамиятли. Бу борада сифат жиҳатидан ўсишга эришилаяпти, бир қанча истиқболли лойиҳалар рўёбга чиқарилмоқда. Шу маънода “Village park” кўнгил-очар иншооти нафақат Шаҳрисабз шаҳри, балки вилоятимиз аҳли учун ҳам улкан янгилик бўлишига шубҳа йўқ.

Азизбек НОРОВ ёзиб олди