Бизга цитаталардан бошқа ҳеч нима қолмади. Бизнинг тилимиз - цитаталар тизими.

* * *

Жаннатни ҳар ким ўзича тасаввур қилади, менга у болалик йилларимданоқ кутубхона бўлиб кўринган.

* * *

Ҳақиқат шундаки, яқинларимиз ва севганимиздан бошқа ҳеч ким бизни хафа қилолмайди.

* * *

Дўстлик туйғуси ҳаёт деб аталмиш хаоснинг муҳаббат ва шунга ўхшаш бошқа қиёфаларидан камроқ жумбоққа эга эмас. Баъзан ўйлаб қоламан: тилсими бўлмаган ягона туйғу бахт бўлса керак, чунки у ўз-ўзига жо бўлган.

* * *

Бир-бири билан хайрлашмоқ – айрилиқни тан олмаслик ва бундай ўйлашдир: бугун биз шунчаки ҳижронга итоат этамиз, эртага эса яна кўришамиз.

* * *

Ўз яқинларини кечирадиганлар бахтли, ўз-ўзини кечирганлар бахтиёр.

* * *

Баъзида эркак киши аёл муҳаббатига бор-йўғи уни унутиш, бошқа у ҳақида ўйламаслик учунгина эришади...

* * *

Борлиқнинг ўзи сирли, аммо бу асрор бир нечта нарсаларда аёндек. Денгизда, зарғалдоқ тусда, нуронийнинг кўзларида, мусиқада уни кўриш мумкин.

* * *

Мен на ўч олиш, на афв этиш ҳақида гапираяпман. Унутмоқ – мана ягона қасос ва ягона афв.

* * *

Кечаги одам бугун ҳам кечаги эмас.

* * *

Мен буни аллақачон тушунганман: ҳар нарса – чеҳра, сўзлар, компас, сигарета нави ҳам, агар уларни хотирангдан буткул ўчириб ташлай олмасанг, сени чексиз алам-изтиробларга гирифтор қила олади.

* * *

Саройларни вайрон қилгувчи Вақт шеърнинг қийматини оширади.

* * *

Искандарияда айтишардики, фақат гуноҳ қилган ва тавба чеккан одамгина қайтиб бу ишни қилмайди; бу гапни тўлдирамиз: хатодан озод яшамоқ учун аввал унинг асири бўлмоқ керак.

* * *

Ҳар бир одамнинг тақдири, у қанчалик узун ёки мураккаб бўлмасин, барибир, ягона бир лаҳзада жамланади – бу лаҳзада инсон ўзининг аслида ким эканини бир марта, аммо бир умрга англаб етади.

ХУРШИДА тайёрлади.