Таъкидланганидек, 22 майдан 26 майга қадар бўлиб ўтадиган тарғибот тадбирлари вилоятимизнинг барча туман (шаҳар)ларида ташкил қилиниб, уларда таниқли ёзувчи-шоирлар, олимлар, кино ва театр актёрлари, ҳарбийлар, эстрада хонандаларидан иборат тарғиботчилар гуруҳи иштирок этади. Ташкил этиладиган учрашувларда вилоятимиз аҳли билан юзма-юз мулоқотлар ўтказилади, мамлакатимизда амалга оширилаётган кенг қамровли ислоҳотлар, фуқароларимиз ҳаётида юз бераётган ижобий ўзгаришлар хусусида суҳбатлашилади.

Шунингдек, учрашувлар чоғида Президентимиз Шавкат Мирзиёевнинг яқинда нашрдан чиққан "Буюк келажагимизни мард ва олижаноб халқимиз билан бирга қурамиз" номли китобида илгари сурилган ғояларни одамлар онгига ҳаётий мисоллар ёрдамида, содда ва самимий усулда кенгроқ етказиш ҳам кўзда тутилган. Жойлардаги мактаблар, академик лицей ва касб-ҳунар коллежлари, олий таълим муассасалари, маданият ва санъат масканлари, марказий майдон ва ўйингоҳлар, меҳрибонлик ва мурувват уйлари, ҳарбий қисмлар ва маҳалла, қишлоқ фуқаролар йиғинларида ўтказиладиган ҳар бир учрашув олдидан "Буюк келажагимизни мард ва олижаноб халқимиз билан бирга қурамиз" деб номланган фотокўргазма ташкил қилиниши, бугунги тинч ва фаровон кунлар қадри, турли ёт ғояларга алданганларнинг фожиали қисмати ҳикоя қилинган қисқа метражли фильмлар намойиш этилиши кўзда тутилган. Шунингдек, учрашувлар мобайнида Халқ билан мулоқот ва инсон манфаатлари йили Давлат дастурининг ижроси бўйича амалга оширилаётган ишлар юзасидан юртдошларимизнинг фикрларини ўрганиш ҳам режалаштирилган.

Тарғибот тадбирлари доирасида театр, кино актёрлари билан учрашув-мулоқотлар ўтказилиб, концерт дастурлари намойиш қилинади. Тадбирнинг якуний қисми Қарши шаҳридаги амфитеатрда бўлиб ўтади.

Х.ҚИЛИЧЕВА