Унда сўзга чиққанлар томонидан таъкидланганидек, Ўзбекистон Республикаси Президенти - Қуролли Кучлар Олий Бош Қўмондони Шавкат Мирзиёевнинг бевосита раҳбарлигида стратегик ва тактик вазифаларни бугунги кун талаблари даражасида ҳал қила оладиган, мамлакатимизнинг тинчлиги ва барқарорлигини бузишга қаратилган ҳар қандай ёвуз ҳаракатларга муносиб зарба беришга қодир миллий армиямизни кучайтириш йўлидаги кенг кўламли ишлар давом этмоқда.

Хусусан, мустақиллик йилларида мамлакатимизда жаҳон талабларига жавоб берадиган, замонавий техника ва қурол-яроғ, малакали ҳарбий мутахассислар билан таъминланган профессионал миллий армиямиз барпо этилди. Қўшинларнинг сифат таркиби яхшиланиб, сафларини тўлдириш тартиби такомиллашди. Ҳарбий тузилмаларда миллий қадриятларимизга хос соғлом маънавий-ахлоқий муҳит яратилди. Ҳарбий хизматга ёндашув тубдан ўзгариб, Ватан ҳимоячиларининг ижтимоий ҳимоясига устувор аҳамият қаратилди. Сержантлик мақоми юксалиб, улар миллий армиямизнинг таянчи ва суянчига, осойишта ва обод турмушимизнинг қудратли қалқонига айланди. Эндиликда замонавий армиямизни сержантлар таркибисиз тасаввур этиб бўлмайди.

Тадбирда сўзга чиққанлар томонидан бу борада эришилаётган ютуқлар билан бир қаторда, амалга оширилиши лозим бўлган вазифалар хусусида ҳам тўхталиб ўтилди.

- Форумни ташкил этишдан мақсад сержантларнинг ўзаро тажриба алмашишини таъминлаш ҳамда жанговар шайлигини оширишга эришишдир, - дейди округ қўшинлари қўмондонининг шахсий таркиб билан ишлаш бўйича ўринбосари, полковник Ж.Аъзамов. – Зеро, ёш аскарларга устоз, офицерларга ишончли ёрдамчи бўлган сержантларнинг маҳорати Қуролли Кучларимизнинг салоҳиятини оширишда муҳим аҳамиятга эга.

Икки кун давом этган форумда сержантлар жанговар шайлик, маънавий-маърифий тайёргарлик бўйича билим ва кўникмаларини оширди. Амалий машғулотлар орқали ўзаро тажриба алмашди.

Форум якунида бир гуруҳ илғор сержантларга навбатдаги ҳарбий унвонлар берилди. Уларга Жануби-ғарбий махсус ҳарбий округ қўмондонлиги томонидан фахрий ёрлиқ ва эсдалик совғалари топширилди.

Ж.БОЙМУРОДОВ