Юртимизда пахта йиғим-терими қизғин паллага кирган шу кунларда чигит экиш ишларини ўз вақтида бажарган, барча агротехник тадбирларни сифатли амалга оширган фермер хўжаликлари бирин-кетин белгиланган марра чизиғини босиб ўтишмоқда. Бу эса етиштирилган пахта ҳосили юқори нархларда сотилиши ва даромаднинг мўл бўлишини таъминлайди.

Шаҳрисабз туманидаги "Асланбек Негматов" фермер хўжалиги ҳам бу борада илғор субъектлардан бири ҳисобланади. Жорий йилда хўжалик аъзолари 54 тонналик пахта хирмонини бунёд этиб, давлатга қимматбаҳо хом ашё сотиш бўйича шартнома режасини туманда биринчилардан бўлиб уддалашди.

- Бу йил 15 гектар майдонга ғўзанинг "Наманган-77" навини эккан эдик, - дейди хўжалик иш юритувчиси Илҳом Тўраев. - Об-ҳавонинг қулай келиши, қолаверса, ишловларни ўз вақтида бажарганимиз ҳисобига кутилган натижага эришдик. Дастлабки режа бажарилди, аммо ҳали ғўзаларимизда кўсак кўп. Бу эса шартнома режасини яна бир неча   фоизга ошириб бажарамиз, деганидир.

Фермер хўжалигининг яна бир тармоғи анорчиликдир. Ўтган йили хўжалик аъзолари бир ярим гектар анорзордан 15 тонна сара маҳсулот йиғиб олиб, Россияга экспорт қилишган эди. Бу йил эса ҳосил янада мўл. Айни пайтда анорлар териб олинмоқда. Улар бир муддат сақланиб, сўнг чет эллик буюртмачиларга етказиб берилади.

Ж.БОЙМУРОДОВ

С.НАРЗИЕВ олган суратлар.