- Мазкур реконструкция ишлари уч босқичда олиб борилади, - дейди "Насаф" жамоасининг медиа менежери Юнус Набиев. - Дастлабки босқичда стадионнинг чими таъмирланади, СIP сектор ўриндиқлари янгиланади. Шунингдек, югуриш йўлкалари ўрнида қўшимча минбарлар барпо этилаяпти. Натижада 16 минг томошабинга мўлжалланган стадионнинг сиғими қўшимча қарийб 10 мингга ортиши кўзланмоқда. Иккинчи босқичда "Насаф" футбол мактаби ёш футболчилари учун замонавий кўринишдаги усти ёпиқ, кенг қулайликларга эга футбол майдони, яъни манеж қуриб берилади. Сўнгги босқичда эса стадион ёнида ушбу мактаб тарбияланувчилари таҳсил оладиган кўркам ўқув биноси ҳамда ётоқхона барпо этиш мўлжалланган.

Маълум бўлишича, ўтган йилнинг ноябрь ойида қурилиш-таъмирлаш ишлари бошланган. Айни вақтга келиб, футбол майдонидаги дренаж тизими бутунлай янгиланди. Бу эса келгусида ноқулай об-ҳаво шароитида ҳам майдонда кўлмаклар ҳосил бўлиши ва сув тўпланишига йўл қўймаслик имконини беради.

Клуб матбуот хизмати маълумотларига қараганда, стадион чими Қарши шаҳридаги Спутник қўрғонида жойлашган клуб ёшлари қароргоҳининг янги майдонига кўчириб ётқизилган. Жорий йилнинг март ойи сўнгига қадар марказий стадион майдонига воҳа иқлимига мос махсус чим ётқизилади. Муҳим жиҳати шундаки, реконструкция ишлари давомида асосий эътибор футбол мухлислари учун янада кўпроқ қулайликлар яратиш, уларнинг хавфсизлигини таъминлашга қаратилган. Мисол учун, ҳар бир секторнинг кириш йўлаги янада кенгайтирилади. Бу томошабинларнинг стадион трибунасига эркин ва хавфсиз кириб-чиқишини таъминлайди.

- Келгусида футбол майдонининг ёритиш тизимини ҳам яхшилаш режалаштирилган, - дея қўшимча қилади Юнус Набиев.

Унинг билдиришича, бунинг самарасида майдонни ёритиш даражаси аввалги 1 минг 200 люкс (ёритилганлик даражасининг ўлчов бирлиги)дан 2 минг люксга етади. Бу жаҳон талабларига тўла жавоб беради. Бундан ташқари, марказий стадионнинг инфратузилмаси бутунлай янгиланади. Барча хоналар тўлиқ таъмирланиб, янгидан жиҳозланади. Томошабинларнинг футбол томоша қилиб, мароқли ҳордиқ чиқаришлари учун барча шарт-шароитлар яратилади.

Азизбек НОРОВ