Калифорниядаги ёнғинлар зарар етказиш қамрови ва шу билан боғлиқ йўқотишлар бўйича АҚШ тарихидаги энг йирик табиий офат бўлиши мумкин. Бу ҳақда штат губернатори Гэвин Ньюсом NBC телеканалига берган интервьюсида маълум қилган.

У ҳозирги ҳолатни умумий ҳисобда 24 мингта турар жойни йўқ қилган 2017 ва 2018 йиллардаги ёнғинлар билан таққослаган. Губернатор ҳамон давом этаётган табиий офат йўқотишлар, қамров ва  вайронкорлик кўлами бўйича энг йириги бўлишини тахмин қилган.

Унинг қайд этишича, яқин кунларда ҳудудда шамол тезлиги соатига 50 миль (80,47 километр)дан ортиши кутилмоқда ва бу ёнғинни ўчириш билан боғлиқ вазиятни қийинлаштиради. Гэвин Ньюсом шу туфайли бу офатдан жабр кўрганлар сони ортишини таъкидлаган.

Эслатиб ўтиш жоиз, 7 январда Калифорния штатидаги Лос-Анжелес округининг ғарбий қисмида шамол билан ўрмон ёнғинлари бошланган эди.