Икки йил аввал корхонанинг мавжуд қувватлари техник ва технологик жиҳатдан янгиланиши натижасида маҳсулот сифати ошиши ва ишлаб чиқариш ҳажми сезиларли даражада кўпайишига эришилди. Замонавий дастгоҳлар билан жиҳозланган цехда тайёрланган маҳсулот асосан ички бозорга етказиб берилиши билан бирга хорижий мамлакатларга ҳам экспорт қилинаяпти. Ўтган йили корхона томонидан Туркманистонга 35 минг долларлик товар реализация қилингани бунга ёрқин мисол бўла олади.

- Жорий йилнинг ўтган даврида амалга оширилган экспорт кўлами 30 минг доллардан ошди, - дейди корхона раҳбари Ойбек Эргашев. – Йил охирига қадар бу кўрсаткич янада юқори бўлиши кутилаяпти. Чунки чет элда маҳсулотимизга харидорлар кўп, бир қанча хорижлик ҳамкорлар билан шартномалар тузганмиз. Қолаверса, маҳаллий мебель ишлаб чиқарувчиларни ҳам ламинатланган панеллар билан таъминлаяпмиз. Маҳсулотимиз учун зарур хомашёни асосан четдан келтирамиз. Айни вақтда бир кунда ўртача 480 дона ламинатланган панель   ишлаб чиқараяпмиз. Мавжуд ускуналар барча рангдаги маҳсулотларни тайёрлашга кенг имкон беради. Корхонамизда 40 нафар ишчи меҳнат қилаяпти.

Аҳамиятлиси, келгусида мазкур қўшма корхона томонидан янги йўналиш – текстиль маҳсулотлари ишлаб чиқаришни йўлга қўйиш кўзда тутилган. Қарши шаҳридаги собиқ пахта тозалаш заводи негизида ташкил этилаётган фабрикада замонавий ва энергия тежамкор технологик ускуналар ўрнатилади. Бу ерда дунё бозорида рақобатбардош сифатли ип калавадан тортиб тайёр маҳсулотгача ишлаб чиқариш мақсад қилинган. Маҳсулотнинг асосий қисми экспортга йўналтирилади. Муҳими, ушбу лойиҳанинг муваффақиятли рўёбга чиқарилиши кўплаб ёшларни муқим иш ўринлари билан таъминлашга шароит ҳозирлайди.

М.ШУҲРАТОВ

* * *

Суратларда: “Wood decor production” қўшма корхонаси фаолиятидан лавҳалар.

Собир НАРЗИЕВ олган суратлар.