Таъкидланганидек, мамлакатимизда қишлоқ хўжалигини ислоҳ қилиш, айниқса, фермерлик ҳаракатини янада ривожлантириш, мева-сабзавот ва полиз маҳсулотлари етиштириш кўламини ошириш, уларни қайта ишлаш ва экспорт қилиш ҳажмини кўпайтиришга алоҳида эътибор қаратилмоқда. Мамлакатимизнинг Биринчи Президенти Ислом Каримовнинг 2016 йил 12 апрелдаги “Мева-сабзавот, картошка ва полиз маҳсулотларини харид қилиш ва улардан фойдаланиш тизимини такомиллаштириш чора-тадбирлари тўғрисида”ги қарори бу борада муҳим омил бўлаяпти.

Қайд этиш жоиз, сўнгги йилларда вилоятимизда замонавий технологиялар асосида мева-сабзавотни қайта ишлашни ташкил этиш суръати ошаяпти. Жорий йилнинг ўтган даврида айни шу йўналишда 10 дан ортиқ лойиҳа ҳаётга татбиқ этилгани бунга мисолдир. Шунингдек, ташқи бозорда юртимизда етиштирилган сархил қишлоқ хўжалиги маҳсулотлари, хусусан, ҳўл ва қуруқ мева, сабзавот ва полиз маҳсулотларига талаб ошаётгани натижасида экспорт кўлами ортмоқда. Шу вақтга қадар вилоятимиздан ҳам катта миқдордаги маҳсулотлар чет эллик истеъмолчиларга етказиб берилди. Шундай экан, мазкур тадбир маҳаллий ишлаб чиқарувчи ва экспортчи корхоналар ўртасида истиқболли ҳамкорлик алоқаларини янада ривожлантиришга хизмат қилиши билан аҳамиятлидир.

- Жорий йилнинг ўтган даврида Россияга 670 тонна узум жўнатдик, - дейди ярмарка иштирокчиси, Китоб туманидаги “Тупчоқ узумзори” агрофирмаси раҳбари Ўткир Ортиқов. – Узумни асосан маҳаллий фермерлар ва аҳолидан шартнома асосида сотиб олаяпмиз. Талабга қараб келгусида экспортга йўналтириладиган маҳсулот турини кўпайтирмоқчимиз. Ушбу ярмарка давомида маҳсулот етиштирувчилар билан кўплаб манфаатли келишувлар имзолашни режалаштираяпмиз. 

Маълумотларга кўра, ўтган йили вилоятимизда 134 минг тонна картошка, 106 минг тонна полиз маҳсулоти, 106 минг тонна мева ва 71 минг тонна узум етиштирилган. 2016 йилда бу борада сезиларли ўсиш қайд этилиши кутилмоқда. Маҳсулотларнинг асосий қисми ички бозорга йўналтирилган бўлса, истеъмолдан ортгани хорижга сотилмоқда.

Ҳудудий мева-сабзавот ярмаркаси бугун ўз ишини якунлайди.

Мирзоҳид ЖЎРАЕВ

Суратларда: ярмарка фаолиятидан лавҳалар.

Собир НАРЗИЕВ олган суратлар.