Қарши туманида ўтказилган “Гуллар ва қушлар байрами” тадбири юқоридаги фикрларга ҳамоҳанг тарзда ташкил этилиб, унда тумандаги мактабларда таълим олаётган ўқувчи ёшлар иштирок этишди. Ҳам ўзига хос экологик байрам, ҳам кўрик-танлов сифатида ўтказилган тадбирда турли-туман гуллар, сайроқи ва декоратив қушлар парвариши билан шуғулланаётган ўғил-қизларнинг табиатни асраш, яшил олам вакиллари ҳамда қанотли дўстларига бўлган муносабати чизган расмлари, шеърлари, тайёрлаган тар-ғибот плакатлари орқали акс эттирилди. Турфа гуллар ва қушлардан иборат кўргазма ташкил этилиб, ўқувчилар табиатга яқинлик, жониворларга ғамхўрликларини намойиш қилишди. Табиат ва экология борасида олинаётган билимлар юзасидан савол-жавоб ўтказилди.

- Мазкур тадбирни ўтказишдан асосий мақсад – ўқувчилар қалбида табиатга меҳр, қушлар ва ўсимликлар дунёсига тўғри муносабатни шакллантиришдан иборат, - дейди туман “Баркамол авлод” болалар маркази директори ўринбосари Фотима Мирзаева. - Зеро, табиатга меҳр болаликдан уйғонади. Тадбирда ўқувчиларимизнинг ўзгача иштиёқ билан иштирок этаётганини кўриб, бугунги ёшларимиз орасида табиатга меҳри баланд ўғил-қизлар кўпчиликни ташкил этишига амин бўлдик.

Уч йўналишда ўтказилган танлов натижаларига кўра, ғолиб жамоалар аниқланди. Тумандаги 4- ва 12-мактабларнинг ўқувчилари “Қушлар ва гуллар кўргазмаси” йўналишида биринчи ўринни қўлга киритишди. Табиат, қушлар ҳаёти ҳақидаги викторина саволлари бўйича эса 33-мактаб жамоасига тенг келадигани топилмади. Кўрик-танловнинг “Тарғибот плакатини тайёрлаш” йўналиши бўйича тумандаги 10- ва 63-мактаб ўқувчилари бошқалардан устун эканликларини исботлашди.

Тадбир ўқувчилар томонидан тайёрланган концерт дастури билан якунланди.

Х.АБДУЛЛАЕВА.