Қарши туманидаги "Абдисобиров Бунёджон" кўп тармоқли фермер хўжалигида ҳам ишлар шу асосда олиб борилаяпти. Боғдорчилик асосий тармоқ ҳисобланган ушбу хўжалик тасарруфидаги 10 гектар майдонда 3 минг тупга яқин "Семиренко" ва "Гольден" навли олма дарахти парваришланаяпти. 5 йиллик боғ бу йил ҳар қачонгидан мўл ҳосил қилган. Маҳсулот айни экспортбоп бўлгани боис фермер воситачилар билан олди-сотди шартномасини ҳам тузиб қўйган.

- Президентимиз таъбири билан айтганда, замонамиз фермери нафақат ер билан тиллаша олиши, балки унинг ўзи мутахассис олим, агроном, ҳисобчи, ишбилармон, бир неча хорижий тиллар билимдони бўлишини даврнинг ўзи тақозо этаяпти, - дейди  фермер хўжалиги раиси Абдисобир Раҳматов.      - Эндиликда режа учун ишлаш бизга эмас. Аксинча, кам меҳнат ва ресурс эвазига юқори маҳсулдорликка эришиш, ерга мос навларни танлаш, фаолиятимизда рангбарангликни таъминлашга интилишимиз зарур. Чунки биз шундан манфаат кўрамиз. Бугун етиштираётган маҳсулотимиз экспорт талабига жавоб бериши, ҳар бир саъй-ҳаракатимиз шунга қаратилган бўлиши керак. Шу мақсадда хўжалигимизда кенг миқёсли ишлар олиб бораяпмиз. Боғ қатор орасига мош, қовоқ экканмиз. Улар ҳам хорижга сотиш учун. 21 гектар майдонда пахта парваришлаяпмиз. Мавсумда юқори ҳосил олишга умид қилаяпмиз. Чунки зарур агротехника тадбирларини ўз вақтида бажараяпмиз. Бундан ташқари, чорвачилик тармоғи ривожига ҳам эътибор қаратаяпмиз. Ихтиёримизда 90 бошга яқин қорамол бор. Шунинг 20 боши ўтган йили Украинадан келтирилган зотдор сигирлардир. Уларнинг ҳаммасидан бузоқ олдик. Соғиб олинаётган сутни аҳолига сотаяпмиз. Келгусида чорва бош сонини кўпайтириш ҳисобидан ўзимизда сутни қайта ишлашни ташкил қилмоқчимиз.

Аҳамиятлиси, мазкур субъектда қишлоқ хўжалиги маҳсулотларини узоқ муддат сифатли сақлаш бўйича ҳам иш қилинмоқда. Жумладан, Хитойдан 300 тонна сиғимга эга   совутиш технологияси олиб келиш кўзда тутилган. Лойиҳа жорий йилнинг кузида тўлиқ амалга оширилиши мўлжалланмоқда.

М.ЖЎРАЕВ

Суратларда: Қарши туманидаги "Абдисобиров Бунёджон" фермер хўжалиги фаолиятидан лавҳа.

Собир НАРЗИЕВ олган суратлар.