Тадбир вилоят фавқулодда вазиятлар, халқ таълими бошқармалари ва “Камолот” ёшлар ижтимоий ҳаракати вилоят кенгаши ҳамкорлигида ёз мавсумида болаларни дам олдириш ва соғломлаштириш масканларида содир бўлиши мумкин бўлган фавқулодда вазиятларнинг олдини олиш ҳамда оромгоҳ раҳбарлари, тарбиячилари, етакчилари ва болаларни фавқулодда вазиятларда тўғри ҳаракат қилишга тайёрлаш, ёшларни ҳарбий ватанпарварлик руҳида тарбиялаш, уларда фуқаро муҳофазасига оид билим, малака, кўникмаларни шакллантириш, ўзи ҳамда ўзгаларга ёрдам беришга ўргатиш мақсадида ташкил этилди.

- Муассасамизда бу каби мусобақалар мунтазам равишда ўтказиб келинади, - дейди оромгоҳ бош етакчиси Алишер Зокиров. – Ёз мавсумининг биринчи босқичида ўтказилган “Ёш қутқарувчи” спорт мусобақалари болаларда ҳам, оромгоҳ ходимларида ҳам катта таассурот қолдирганди. Бу сафаргиси эса янада қизиқарли тарзда ўтди.

Иштирокчилар икки – “Шунқорлар” ва “Ёш қутқарувчи” жамоаларига бўлинган ҳолда фавқулодда вазиятларда тўғри ҳаракат қилиш борасида ўз билим-маҳоратларини синовдан ўтказишди. Масалан, жамоалар эстафета тарзида югуриш, оловли ҳалқадан ўтиш, фавқулодда вазиятларда одамларни хавфсиз жойга эвакуация қилиш, чўкаётган ёки жароҳатланганларга биринчи тиббий ёрдам кўрсатиш каби шартлар асосида ўзаро беллашди.

Ўз навбатида, “Ёш қутқарувчи” спорт мусобақалари доирасида фавқулодда вазиятлар бошқармаси ходимлари болалар билан юзага келиши мумкин бўлган фавқулодда вазиятларда тўғри ҳаракатланишга доир тарғибот-ташвиқот ишларини олиб боришди.

Шу ўринда айтиш лозим, вилоят ҳокими – фуқаро муҳофазаси бошлиғининг жорий йил 8 июндаги тегишли буйруғига мувофиқ, вилоятимиздаги мавжуд 19 та болалар соғломлаштириш оромгоҳида тасдиқланган график бўйича ҳар босқичда “Ёш қутқарувчи” спорт мусобақалари ўтказиб борилади.

А.НОРОВ