Нишон туманида чегара қўшинлари ҳарбий хизматчиларининг оилалари учун бунёд этилган шинам уйлар ҳам ана шу эзгу ишлар самарасидир. 

Ушбу янги турар жойларни ҳарбийлар оилаларига топширилиши муносабати билан ташкил этилган тадбирда чегарачилар, туман ҳокимлиги ва жамоатчилик вакиллари иштирок этди.

Унда Президентимиз раҳнамолигида мустақиллик йилларида замонавий қурол-яроғ ва техникага эга, ихчам ва тезкор миллий армиямиз шакллантирилгани мамлакатимиз мустақиллиги, хавфсизлиги ва осойишталигини таъминлашга хизмат қилаётгани таъкидланди.

- Ватан посбони дея улуғланадиган шарафли касбни танлаганимдан фахрланаман, - дейди чегара қўшинлари сержанти, янги уй соҳибларидан бири Анвар Саримсоқов. - Айниқса, чегарачилар ва уларнинг оила аъзоларига яратилаётган бундай шарт-шароитлар, юксак эътибор учун Юртбошимиздан миннатдормиз. Ўз навбатида, бу каби рағбат биз чегарачиларни руҳлантириб, янада сергак, масъулиятли бўлишга ундайди.

Янги қурилган турар жойлар хоналари кенг, ёруғ ва замонавий усулда жиҳозланган. Уйлар яқинида барпо этилган кўркам болалар майдончаси эса ҳарбийларнинг фарзандлари учун ажойиб совға бўлди.

- Янги ва замонавий уйга эга бўлганимиздан беҳад хурсандман, - дейди кичик сержант Марат Норовнинг турмуш ўртоғи Дурдона Носирова. - Истиқлолимизнинг 25 йиллиги байрами арафасида бу биз учун ажойиб туҳфа бўлди. Ўз навбатида, турмуш ўртоғим ҳарбий хизматчи эканидан фахрланаман. Келажакда фарзандларимизни ҳам шу юртнинг муносиб посбонлари қилиб тарбиялаймиз.

* * *

Шу куни чегара пости ёнида қуриб битказилган кўркам сунъий қопламали футбол майдончаси ҳам фойдаланишга топширилди. Чегара олди маҳаллалари аҳолиси ва ҳарбийларнинг бўш вақтларини мазмунли ташкил этиш мақсадида қурилган ўйингоҳда  дастлабки мусобақа ҳам ўтказилди.

Унда чегара олди ҳудудидаги маҳаллаларда истиқомат қилувчи спортчи ёшлар ва ҳарбий хизматчилардан ташкил топган жамоалар майдонга тушди. Қизғин кечган баҳслар асосида аниқланган ғолиб ва совриндорлар эсдалик совғалари билан тақдирланди.

Азизбек НОРОВ

Суратда: тадбирдан  лавҳалар.