Истиқлолимизнинг йигирма беш йиллик байрами арафасида "Гўзал ва бетакроримсан, муқаддас Ватаним, жоним сенга фидо, Ўзбекистоним!" шиори остида "Соғлом она ва бола йили" Давлат дастури ижроси доирасида ўтказилган умумхалқ хайрия ҳашарида улкан рамзий маъно мужассам, албатта. Чунончи, остонадан, хонадонларимиздан бошланадиган хайрия тадбири бутун вилоятимиз бўйлаб кенг қулоч ёзди.

Икки кунлик умумхалқ хайрия ҳашарида вилоятимиздан 1 миллион 192 минг нафардан зиёд киши иштирок этган бўлса, шундан 736 минг 49 нафарини ёшлар ташкил этгани қувонарлидир.

Хусусан, вилоят марказини янада обод, саранжом-саришта ҳудудга айлантиришда маҳалла фаоллари, ташкилот, корхона ва муассасаларнинг кўнгилли вакиллари, ёшлари фаол иштирок этдилар. Теварак-атроф тартибга келтирилиб, болалар майдончалари, кўп қаватли уйлар олдидаги йўлаклар таъмирланди. Турар жойлар, кўча, боғ ва хиёбонлар ободонлаштирилди. Тунги ёритиш чироқлари янгиланди.

Тўйга тўёна билан, деганларидек кўплаб иншоотлар, хусусан, гузарлар, маиший хизмат кўрсатиш шохобчалари, спорт иншоотлари, янги боғлар барпо этилиши айни ҳашар кунларида ниҳояланди.

"Ҳеч ким меҳр ва эътибордан четда қолмасин" шиори остида ҳашар кунлари 812 нафар уруш ва меҳнат фронти фахрийлари, кекса ва ногиронлар, ёлғиз қариялар, боқувчисини йўқотган, эҳтиёжманд оилаларнинг турар жойлари ободонлаштирилди, таъмирланди. Шунингдек, Меҳрибонлик, Саховат, Мурувват уйларида яшовчилар, кўмакка муҳтож оилалар, ногирон ва ёлғиз кексаларга 96 миллион сўмликдан зиёд моддий ёрдам кўрсатилди.

Ана шундай уюшқоқлик ва кўтаринки руҳда ўтган ҳашар халқимизнинг бунёдкорлик салоҳиятини, ободонлаштириш ва тозалик ишларига алоҳида эътибор қаратишини, бағрикенглик, саховатпешалик фазилатларини яна бир бор намоён этди. Дарҳақиқат, воҳа аҳли қутлуғ байрамни яратувчанлик руҳи билан, кўтаринки кайфиятда, ёруғ юз билан кутиб олмоқда.

Шоҳиста БОЗОРОВА