* * *

Ўз оиласи, ўз халқи ва ўз Ватанини севмаган, қадрламаган одам ҳеч бир ҳурмату эътиборга лойиқ эмас.

* * *

Ўзга элу халқлар устидан фақат ҳукмронлик қилишга интилган давлатлар бир кун келиб албатта мағлубиятга учрайдилар.

* * *

Ёлғону мақтовни эшитиб хурсанд бўлгандан кўра, росту танқидни эшитиб хатони тўғрилаш афзалдир.

* * *

Юксак орзу-умидларинг сари интилаётган вақтингда дуч келган ташвишу қийинчиликларга сабрли бўл.

* * *

Оломон олиму донишлардан кўра бузғунчи-нодонларга бўйсунишга мойилдир.

* * *

Айримлар бандани қўрқитар мансабингдан олурман деб, бандаси ўйлар бу ташвишли амалдан қачон қутуламан деб.

* * *

Майда кўпкарида юрган чавандозлар катта кўпкарига кирсалар шошиб, нима қилишини билмай қоладилар. Ҳаёту тирикчилик учун кураш ҳам худди шундай жараёндир.

* * *

Нодону худбиннинг таомига шерик бўлсанг, бир умр эшагига қўшиб ишлатмоқчи ёхуд итига қилган муомалани қилмоқчи бўлади.

* * *

Юпину хароб кийинганлар ва ночору ожиз кўринганларга аксариятимиз ачиниш ҳисси билан қараймиз.

* * *

Мулку мансаб ишқида бир умр изтироб чекиб яшашдан кўра, қир-адирда қўй-эчки боқмоқ афзалдир.

* * *

Эркаклар бевақт севиб қолсалар изтироб чекадилар, аёллар эса кулги бўладилар.

* * *

Майхўрлар биргаликда майхўрлик қилишни одат қилганлардан бошқаларни тан олмайдилар.

Абдишукур ОМОНОВ