Давлату жамиятдаги ютуқлар, ўзгаришлар ҳар бир фуқаронинг шахсий ҳаётига ижобий таъсир кўрсатсагина тан олинади, эътироф этилади.

* * *

Фақат мақтанишни одат қилсанг, ёлғончига айланасан.

* * *

Аксарият мулки кўплар амали катталар билан, баъзи амали катталар бойлиги кўплар билан яқин бўлишни истайдилар.

* * *

Ўтмишнинг хатоси бугун сезилаётган бўлса, бугуннинг хатоси эртага кўринади.

* * *

Барчамиз бу дунёга меҳмон эканлигимизни билсак-да, аксариятимиз ўзимизни фанонинг мезбони деб ҳисоблаймиз.

* * *

Барча ислоҳатчилар ўтмишдан хато ва камчилик излайдилар.

* * *

Севмаган ва севилмаган қалб - ғарибдир.

* * *

Маънавиятсиз раҳбарлар ўз атрофида ўзидан ҳам жоҳил ва худбин ходимларни тўплаб олади.

* * *

Энг кучли шеру йўлбарслар ҳам эҳтиёткорлик ва айёрлик қилишдан холи эмаслар.

* * *

Катта раҳбарлар атрофида ўзини фидойи, ишчан, итоаткор ва содиқ қилиб кўрсатишга ҳаракат қилувчилар кўплаб топилади.

* * *

Ислоҳотлар қилиб турилмаса, давлату жамиятда яширин иллатлар кўпайиб кетади.

  * * *

Оиласини севмаган халқини, халқини севмаган юртини севмайди.

А.ОМОНОВ