Аёллардан бири дебди: пули кўп ва сахий эркаклардан ақлу ҳусн талаб қилмаймиз.

* * *

Аксарият пора олиб, пора беришни одат қилганлар порахўрлик йўқлиги ёхуд порахўрликка қарши кураш ҳақида маддоҳлик қиладилар.

* * *

Айрим раҳбарларнинг ўз соҳасининг "пир"лари фикру мулоҳазасига эътибор бермаслиги ачинарлидир.

* * *

Фикру сўзингнинг ҳақиқий маъносини тушунмайдиган, англамайдиганлар билан мулоқотда бўлмасликка ҳаракат қил.

* * *

Уйида эрини назар-писанд қилмайдиганлар ҳам кўчада "хўжайин" дейишни қойиллатади.

* * *

Ўзининг ўта тор манфаати йўлида юрганлар ҳам "элу улус манфаатини кўзлаб" гапирадилар.

* * *

Давлату жамиятдан иш, иш ҳақи, нафақа ва моддий ёрдам сўрамасдан ўз тирикчилигини қилиб юрганлар ҳам таҳсинга лойиқдирлар.

* * *

Эртанинг ғаму ташвишини қилиб юрганлар ақлли одамлардир.

* * *

Моддий ёрдамнинг  ошкора кўз-кўз қилиниши - эҳсонни миннат қилишдир.

* * *

Барчамиз ҳаётимиз яхши бўлишини истаймиз, кўпчилигимиз бу ҳақда мақтанишни одат қиламиз, аммо кўп нарсалар эскича қолаверади.

* * *

Оила ташвиши - энг муҳим, энг зарур ва энг яхши ташвишдир.

* * *

Мулкдору амалда бўлсанг, ҳар сўзинг доно фикр сифатида қабул қилинса, мулксизу амалсиз бўлсанг, зарур ва ақлли фикринг ҳам эътиборсиз қолади.

Абдишукур ОМОНОВ